సూపర్ స్టార్ మహేష్ బాబు, కీర్తి సురేష్ జంటగా పరశురామ్ దర్శకత్వంలో రూపొందుతున్న ‘సర్కారు వారి పాట’ చిత్రాన్ని ఉగాది సందర్భంగా ఏప్రిల్ 1న విడుదల చేస్తామంటూ ఫిల్మ్‌మేకర్స్ ఇప్పటికే ప్రకటించిన సంగతి తెలిసిందే. అయితే అభిమానులు సినిమా నుంచి ఒక పాట లేదా మేకింగ్ వీడియో ఏదో ఒకటి విడుదల చేయాలని కోరుతున్నారు. ఇతర హీరోల సినిమాల పోస్టర్‌లు, వీడియోలు సోషల్ మీడియాను కుదిపేస్తుంటే మహేష్ బాబు ‘సర్కారు వారి పాట’ అప్ డేట్స్ లేకపోవడం బాధాకరంగా ఉందంటూ అభిమానులు సోషల్ మీడియా ద్వారా మైత్రి మూవీ మేకర్స్‌ను ట్యాగ్ చేసి విజ్ఞప్తి చేస్తున్నారు. తాజాగా ఒక అభిమాని సోషల్ మీడియాలో ‘సర్కారు వారి పాట’ అప్‌డేట్ ఇవ్వొచ్చు కదా అని మైత్రి మూవీ మేకర్స్ వారిని ఉద్దేశించి ట్వీట్ చేశాడు.
దీనికి సమాధానంగా అందుకు సమయం ఉందని మైత్రి మూవీ మేకర్స్ వారు సమాధానం ఇవ్వడం జరిగింది. అయితే ‘సర్కారు వారి పాట’ విడుదల జనవరిలోనే సంక్రాంతి కానుకగా ఉండి ఉంటే ఇప్పటికే రెండు పాటలు విడుదలయ్యేవి. ప్రమోషన్ కార్యక్రమాలు జోరుగా చేసే వారు. కానీ ఏప్రిల్ అంటే ఇంకా దాదాపు అయిదు నెలల సమయం ఉంది. ఇప్పటి నుండే ప్రమోట్ చేస్తూ వస్తే సినిమాపై జనాల్లో ఆసక్తి తగ్గే అవకాశాలు ఉన్నాయి. అందుకే కాస్త సమయం తీసుకొని సినిమా నుండి ఒక్కో పాటను విడుదల చేసే అవకాశాలు ఉన్నాయంటున్నారు. విశ్వసనీయ సమాచారం ప్రకారం సంక్రాంతికి ‘సర్కారు వారి పాట’ నుండి అప్‌డేట్ వస్తుందట. ఈ సినిమా మొదటి సింగిల్‌ను సంక్రాంతికి విడుదల చేస్తారట. ఈమేరకు మొదటి పాటను సిద్ధం చేస్తున్నట్లుగా తెలిసింది. ఇక త్వరలోనే ఈ సినిమా చిత్రీకరణ పూర్తికానుంది. ఆ వెంటనే త్రివిక్రమ్ దర్శకత్వంలో మహేష్ బాబు మూవీ పట్టాలెక్కబోతుంది.