కిరణ్ అబ్బవరం హీరోగా, ప్రియాంక జవాల్కర్ హీరోయిన్‌గా ఎలైట్ ఎంటర్‌టైన్‌మెంట్స్ పతాకంపై శ్రీధర్ గాదె దర్శకత్వంలో ప్రమోద్-, రాజులు నిర్మిస్తున్న చిత్రం ‘ఎస్‌ఆర్ కళ్యాణమండపం’. ఈనెల 6న ప్రపంచ వ్యాప్తంగా 600 థియేటర్స్‌లో ఈ చిత్రాన్ని విడుదల చేస్తున్న సందర్భంగా ప్రీ రిలీజ్ ఈవెంట్ కార్యక్రమాన్ని హైదరాబాద్‌లో ఘనంగా నిర్వహించారు. ఈ కార్యక్రమంలో యస్.వి.కృష్ణారెడ్డి, అచ్చిరెడ్డి, రాజశేఖర్, జీవిత, అల్లరి నరేష్, కార్తికేయ, రాజ్ కందుకూరి, నక్కిన త్రినాథ్, తరుణ్ భాస్కర్, ముత్యాల రాందాస్, సాయి సుశాంత్, అవసరాల శ్రీనివాస్, తేజ సజ్జ తదితరులు పాల్గొని చిత్ర బృందానికి బెస్ట్ విషెస్ తెలియ జేశారు. ఈ సందర్భంగా చిత్ర దర్శకుడు శ్రీధర్ గాదె మాట్లాడుతూ “ఒక కళ్యాణమండపం చుట్టూ జరిగే కథతో ఎంతో ఆసక్తిగా రూపొందిన ఈ సినిమా రాయలసీమ నేపథ్యంలో సాగుతుంది.
వినోదాత్మక అంశాలతో కమర్షియల్ ఫ్యామిలీ ఎంటర్‌టైనర్‌గా ఈ చిత్రం తెరకెక్కింది. ఇందులో తండ్రీ కొడుకుల మధ్య బంధాన్ని గొప్పగా చూపించే ప్రయత్నం చేయడం జరిగింది. ఆగస్ట్ 6న ప్రేక్షకుల ముందుకు వస్తున్న మా చిత్రం అందరినీ ఖచ్చితంగా అలరిస్తుంది”అని అన్నారు. చిత్ర హీరో కిరణ్ అబ్బవరం మాట్లాడుతూ “మేము ఎంతో కష్టపడి ఈ సినిమా తీశాము. నిర్మాతలకు మధ్యలో ఓటిటి ఆఫర్ వచ్చినా కూడా ప్రేక్షకులకు థియేటర్ ఎక్స్‌పీరియన్స్ ఇవ్వాలని ఇప్పటివరకు ఎదురుచూశారు. ఇక ఈ సినిమాను ఈనెల 6న ప్రపంచ వ్యాప్తంగా 600 థియేటర్స్‌లలో విడుదల చేస్తున్నారు”అని తెలిపారు.