వచ్చే విద్యాసంవత్సరంలో 226 పనిదినాలు
2026 మార్చి మొదటివారంలో
ఇంటర్ వార్షిక పరీక్షలు
మే చివరి వారంలో అడ్వాన్స్‌డ్ సప్లిమెంటరీ
అకడమిక్ క్యాలెండర్ ప్రకటించిన ఇంటర్ బోర్డు
మనతెలంగాణ/హైదరాబాద్ : రాష్ట్రంలో వచ్చే విద్యాసంవత్సరం జూన్ 1 నుంచి ఇంటర్ ప్రథమ, ద్వితీయ సంవత్సరం తరగతులు ప్రారంభం కానున్నాయి. ఈ మేరకు గురువారం ఇంటర్ బోర్డు కార్యదర్శి కృష్ణ ఆదిత్య 2025 26 విద్యా సంవత్సరానికి అకడమిక్ క్యాలెండర్‌ను ప్రకటించారు. వచ్చే విద్యా సంవత్సరానికి సంబంధించి పనిదినాలు, తరగతులు, సెలవులు, పరీక్షల షెడ్యూల్‌ను విడుదల చేశారు. వచ్చే విద్యాసంవత్సరంలో మొత్తం 226 పని దినాలలో ఇంటర్ విద్యా సంవత్సరం ఉంటుందని ఇంటర్ బోర్డు తెలిపింది. జూన్ 1 నుంచి ఇంటర్ మొదటి, రెండో సంవత్సరం తరగతులు మొదలవుతాయి. సెప్టెంబర్ 9 నుంచి అక్టోబర్ 5 వరకు దసరా సెలవులు ఉంటాయని తెలిపింది.
దసరా సెలవుల అనంతరం అక్టోబర్ 6న కాలేజీలు పునఃప్రారంభమవుతాయని పేర్కొంది. 2025 నవంబర్ 10 నుంచి 15 వరకు అర్థ సంవత్సరం పరీక్షలు నిర్వహించనున్నట్లు తెలిపింది. 2026 జనవరి 11 నుంచి 18 వరకు సంక్రాంతి సెలవులు ఉంటాయని ఇంటర్ బోర్డు వెల్లడించింది. 2026 జనవరి 19 నుంచి 24 వరకు ప్రీ ఫైనల్ పరీక్షలు, ఫిబ్రవరి మొదటి వారంలో ఇంటర్ ప్రాక్టికల్ పరీక్షలు నిర్వహించనున్నట్లు తెలిపింది. వచ్చే ఏడాది మార్చి మొదటి వారంలో ఇంటర్ వార్షిక పరీక్షలు జరుగుతాయని వెల్లడించింది. వచ్చే ఏడాది మార్చి 31 చివరి పనిదినం అని ఇంటర్ బోర్డు తెలిపింది. 2026 ఏప్రిల్ 1 నుంచి మే 31 వరకు వేసవి సెలవులు అమలవుతాయని ప్రకటించింది. 2026 మే చివరి వారంలో ఇంటర్ అడ్వాన్స్‌డ్ సప్లిమెంటరీ పరీక్షలు నిర్వహించనున్నట్లు పేర్కొంది. వచ్చే ఏడాది జూన్ 1వ తేదీన జూనియర్ కాలేజీలు పునః ప్రారంభమవుతాయని ఇంటర్ బోర్డు ప్రకటించింది.
ఇంటర్ అకడమిక్ క్యాలెండర్
2025 జూన్ 1 నుంచి ఇంటర్మీడియేట్ తరగతులు ప్రారంభం
2025 సెప్టెంబర్ 28 నుంచి అక్టోబర్ 5 వరకు దసరా సెలవులు
2025 నవంబర్ 10 నుంచి 15 వరకు అర్థ సంవత్సరం పరీక్షలు
2026 జనవరి 11 నుంచి 18 వరకు సంక్రాంతి సెలవులు
2026 జనవరి 19 నుంచి 24 వరకు ప్రీ ఫైనల్ పరీక్షలు
2026 ఫిబ్రవరి మొదటి వారంలో ప్రాక్టికల్ పరీక్షలు
2026 మార్చి మొదటి వారంలో ఇంటర్ వార్షిక పరీక్షలు
2026 మార్చి 31 చివరి పనిదినం
2026 ఏప్రిల్ 1 నుంచి మే 31 వరకు వేసవి సెలవులు
2026 మే చివరి వారంలో అడ్వాన్స్‌డ్ సప్లిమెంటరీ పరీక్షలు
2026 జూన్ 1న జూనియర్ కాలేజీల పునః ప్రారంభం