న్యూఢిల్లీ : వైద్యులు, ఆరోగ్య సేవ ప్రొఫెషనల్స్‌పై దౌర్జన్య సంఘటనలు పెరిగిపోతుండడంతో సుప్రీం కోర్టు మంగళవారం పది మంది సభ్యులతో ఒక టాస్క్ ఫోర్స్‌ను ఏర్పాటు చేసింది. వైద్య సిబ్బందికి భద్రత పెం పు, పని పరిస్థితుల మెరుగుదలకు జాతీయ ప్రొటోకాల్ రూపకల్పన చేసే బాధ్యత టాస్క్ ఫోర్స్‌ది. కోల్‌కతాలో ఇటీవల ఒక డాక్టర్‌పై హత్యాచారం జరిగిన నేపథ్యంలో కోర్టు ఈ నిర్ణయం తీసుకున్నది.
టాస్క్ ఫోర్స్ తన మధ్యంతర నివేదికను మూడు వారాల్లోగాను, తుది ని వేదికను రెండు నెలల్లోగాను ఇవ్వవలసి ఉంటుంది. సుప్రీం కోర్టు ధర్మాసనానికి సారథ్యం వ హిస్తున్న ప్రధాన న్యాయమూర్తి (సిజెఐ) డివై చంద్రచూడ్ మహిళా డాక్టర్ల పరిరక్షణ జాతీయ ప్రయోజనం దృష్ట్యా అవశ్యమని, సమానత్వ సిద్ధాంతానికి ఇంతకు మించిన ప్రాముఖ్యం లేదని ఉద్ఘాటించారు.
అట్టడుగు స్థాయిలోపరిస్థితులు మారడానికి దేశం మరొక అత్యాచారం కోసం వేచి ఉండజాలదని సర్వోన్నత న్యాయస్థానం స్పష్టం చేసింది. వైద్య వృత్తిదారుల పరిరక్షణకు చట్టాలు ఉన్నాయని, కాని అవి వ్యవస్థాగత సమస్యలను పరిష్కరించడం లేదని బెంచ్ పేర్కొన్నది. పది మంది సభ్యుల టాస్క్ ఫోర్స్‌లో సర్జన్ వైస్ అడ్మిరల్ ఆర్‌కె సరియన్, ఏషియన్ ఇన్‌స్టిట్యూట్ ఆఫ్ నేషనల్ గ్యాస్ట్రాలజీ మేనేజింగ్ డైరెక్టర్ డాక్టర్ నాగేశ్వర్ రెడ్డి, ఢిల్లీ ఎయిమ్స్ డైరెక్టర్ డాక్టర్ ఎమ్ శ్రీనివాస్, బెంగళూరు నిమ్‌హాన్స్ నుంచి డాక్టర్ ప్రతిమా మూర్తిసహా ప్రముఖులు ఉన్నారు. కేంద్ర క్యాబినెట్ కార్యదర్శి, హామ్ శాఖ కార్యదర్శి టాస్క్ ఫోర్స్ ఎక్స్ అఫీషియో సభ్యులుగా వ్యవహరిస్తారని కూడా బెంచ్ ప్రకటించింది.