మహిళలు, సీనియర్ సిటీజన్ల కోసం ‘టి-9 టికెట్’
పల్లె వెలుగు బస్సుల్లో మహిళలు, సీనియర్ సిటీజన్లకు వర్తింపు
రూ.100 చెల్లిస్తే 60 కిలోమీటర్ల పరిధిలో ప్రయాణించే వెసులుబాటు
రేపటి నుంచి ప్రయాణికులకు అందుబాటులోకి..- Advertisement -
హైదరాబాద్: గ్రామీణ, పట్టణ ప్రయాణికులకు ఆర్థికభారం తగ్గించేందుకు రాష్ట్ర రోడ్డు రవాణా సంస్థ (టిఎస్ ఆర్టీసి) కీలక నిర్ణయం తీసుకుంది. పల్లె వెలుగు బస్సులో ప్రయాణించే మహిళలు, సీనియర్ సిటీజన్ల కోసం ‘టి-9 టికెట్’ అందుబాటులోకి తెచ్చింది. గ్రేటర్ హైదరాబాద్ పరిధిలో టి-24, టి-6, ఎఫ్-24 టికెట్లను ఇప్పటికే అందిస్తోన్న సంస్థ తొలిసారిగా గ్రామీణ, పట్టణ ప్రయాణికుల సౌకర్యార్థం టి-9 టికెట్‌ను అందుబాటులోకి తీసుకురావాలని నిర్ణయించింది. హైదరాబాద్‌లోని బస్‌భవన్‌లో శుక్రవారం ‘టి-9 టికెట్’ పోస్టర్‌ను టిఎస్ ఆర్టీసి ఎండి విసి సజ్జనార్ ఆవిష్కరించారు. ఈ టికెట్ ఈ నెల 18వ తేదీ (ఆదివారం) నుంచి పల్లె వెలుగు బస్సుల్లో కండక్టర్ల వద్ద అందుబాటులో ఉంటాయని ఆయన తెలిపారు.
ఉదయం 9 గంటల నుంచి సాయంత్రం 4 గంటల వరకు
‘టి-9 టికెట్’ పల్లె వెలుగు బస్సుల్లో ప్రయాణించే మహిళలు, సీనియర్ సిటిజన్స్‌కు వర్తిస్తుంది. ఉదయం 9 గంటల నుంచి సాయంత్రం 6 గంటల వరకు మాత్రమే ఈ టికెట్ చెల్లుబాటు అవుతుంది. ఈ టికెట్ ద్వారా 60 కిలోమీటర్ల పరిధిలో ఒక్కసారి రానూపోను ప్రయాణం చేయవచ్చు. ‘టి-9 టికెట్’ కు రూ.100 ధరగా టిఎస్ ఆర్టీసి నిర్ణయించింది. టోల్ గేట్ చార్జీలపై కూడా మినహాయింపు ఇచ్చింది. దీంతో ఈ టికెట్ ద్వారా ఒక్కోక్కరికీ రూ.20ల నుంచి రూ.40ల వరకు ఆదా అవుతందని సంస్థ ప్రకటించింది. 60 ఏళ్లు పైబడిన సీనియర్ సిటీజన్లు వయసు ధృవీకరణ కోసం తమ ఆధార్ కార్డును కండక్టర్లకు చూపించి టి-9 టికెట్ పొందవచ్చు. ఉదయం 9 గంటల నుంచి సాయంత్రం 4 గంటల వరకు మాత్రమే ఈ టికెట్లను కండక్టర్లు ఇస్తారు. రాష్ట్ర పరిధిలో మాత్రమే ఈ టికెట్ చెల్లుబాటు అవుతుంది.
రూ.100 చెల్లించి 60 కిలోమీటర్ల పరిధి..
‘పల్లె వెలుగు బస్సుల్లో ప్రతి రోజు సగటున 15 లక్షల మంది ప్రయాణిస్తున్నారు. అందులో మహిళలు, సీనియర్ సిటీజన్లు ఎక్కువగా ఉంటారు. వారికి ఆర్థికభారం తగ్గించాలన్న ఉద్ధేశ్యంతో పల్లెవెలుగు బస్సుల్లో ‘టి-9 టికెట్’కు టిఎస్ ఆర్టీసి యాజమాన్యం శ్రీకారం చుట్టింది. ఈ టికెట్ తో రూ.100 చెల్లించి 60 కిలోమీటర్ల పరిధిలో రానుపోనూ ప్రయాణించవచ్చు.
టిఎస్ ఆర్టీసి కాల్ సెంటర్‌లో..
గ్రేటర్ హైదరాబాద్ పరిధిలో ఇప్పటికే టి-24, టి-6, ఎఫ్-24 టికెట్లను అందుబాటులోకి తెచ్చామని, వాటికి ప్రయాణికుల నుంచి అనూహ్య స్పందన వస్తోందని టిఎస్ ఆర్టీసి ఎండి విసి సజ్జనార్ గుర్తు చేశారు. ఆ టికెట్లకు మంచి స్పందన వస్తుండటంతో తొలిసారిగా గ్రామీణ, పట్టణ ప్రయాణికుల కోసం ‘టి-9 టికెట్’ను తీసుకువచ్చామన్నారు. ఈ టికెట్ కు సంబంధించిన పూర్తి వివరాలకు టిఎస్ ఆర్టీసి కాల్ సెంటర్ నెంబర్లు 040-69440000, 040-23450033ను సంప్రదించాలని ఆయన సూచించారు. గ్రామీణ, పట్టణ ప్రయాణికులు ఈ సదుపాయాన్ని వినియోగించుకుని సంస్థను ఆదరించాలని ఆయన కోరారు. టి-9 టికెట్’ పోస్టర్ ఆవిష్కరణ కార్యక్రమంలో సంస్థ చీఫ్ ఆపరేటింగ్ ఆఫీసర్(సీఓఓ) డాక్టర్ వి.రవీందర్, జాయింట్ డైరెక్టర్ డాక్టర్ సంగ్రామ్ సింగ్ జీ పాటిల్, ఎగ్జిక్యూటివ్ డైరెక్టర్ (ఈడీ)లు, పివి ముని శేఖర్, పురుషోత్తం, కృష్ణ కాంత్, సిటిఎం జీవన్ ప్రసాద్, సీఎంఈ రఘునాథరావు, సీఈఐటి రాజశేఖర్, సిఎఫ్‌ఎం విజయపుష్ప, తదితరులు పాల్గొన్నారు.
