గంటలోపే పూర్తిగా సబ్‌స్ర్కైబ్

టాటా టెక్ ఐపిఒకు అద్భుత స్పందన

న్యూఢిల్లీ : టాటా టెక్నాలజీస్ ఐపిఒ (ఇనిషియల్ పబ్లిక్ ఆఫర్)కు అద్భుతమైన స్పందన వచ్చింది. ఈ ఐపిఒ ప్రారంభించిన గంటలోపే పూర్తిగా సబ్‌స్క్రైబ్ అయింది. టాటా టెక్నాలజీస్ ఆటోమొబైల్ దిగ్గజం టాటా మోటార్స్ అనుబంధ సంస్థ, అయితే దాదాపు 19 ఏళ్ల తర్వాత టాటా గ్రూప్ ఐపిఒతో ముందుకు వచ్చింది. 2004లో టాటా కన్సల్టెన్సీ సర్వీసెస్ (టిసిఎస్) ఐపిఒ వచ్చింది. ఆ తర్వాత కంపెనీ వచ్చిన ఐపిఒ ఇదే.

టాటా టెక్నాలజీస్ ఐపిఒ ధరను రూ.475 నుండి రూ.500గా నిర్ణయించారు. రిటైల్ పెట్టుబడిదారులు నవంబర్ 24 వరకు ఐపిఒ కోసం దరఖాస్తు చేసుకోవచ్చు. కంపెనీ షేర్లు డిసెంబర్ 5న నేషనల్ స్టాక్ ఎక్స్ఛేంజ్ (ఎన్‌ఎస్‌ఇ), బాంబే స్టాక్ ఎక్స్ఛేంజ్ (బిఎస్‌ఇ)లో లిస్ట్ కానున్నాయి. టాటా టెక్నాలజీస్ గ్రే మార్కెట్ ధర 70 శాతం పెరిగింది. అంటే లిస్టింగ్ రోజున 70 శాతం సంపాదించవచ్చు.

రిటైల్ ఇన్వెస్టర్లు కనీసం ఒక లాట్ అంటే 30 షేర్లకు బిడ్ చేయవచ్చు. రూ. 500 ఐపిఒ ఎగువ ధర బ్యాండ్‌లో 1 లాట్ కోసం దరఖాస్తు చేస్తే రూ.15,000 ఇన్వెస్ట్ చేయాల్సి ఉంటుంది. 1994లో స్థాపించిన టాటా టెక్నాలజీస్ ఒక గ్లోబల్ ఇంజనీరింగ్ సేవల సంస్థ, ఇది ఒరిజినల్ ఎక్విప్‌మెంట్ తయారీదారులు, వారి టైర్1 సరఫరాదారులకు టర్న్‌కీ సొల్యూషన్‌లతో సహా ఉత్పత్తి అభివృద్ధి, డిజిటల్ పరిష్కారాలను అందిస్తుంది. కంపెనీ ప్రధానంగా ఆటోమోటివ్ పరిశ్రమపై దృష్టి సారించింది.