హైదరాబాద్ : షెడ్యూల్ ప్రకారం తెలంగాణ రాష్ట్రంలో నవంబర్, డిసెంబర్‌లో అసెంబ్లీ ఎన్నికలు జరిగే అవకాశం ఉందని రాష్ట్ర ప్రధాన ఎన్నికల అధికారి వికాస్‌రాజ్ స్పష్టం చేశారు. అసెంబ్లీ ఎన్నికల సన్నద్ధత, ఓటరు జాబితా సంబంధిత అంశాలపై రాజకీయ పార్టీల ప్రతినిధులతో ఇప్పటికే రాష్ట్ర ప్రధాన ఎన్నికల అధికారి వికాస్‌రాజ్ సమావేశం నిర్వహించారు. రాష్ట్రంలో షెడ్యూల్ ప్రకారమే ఎన్నికలు జరిగే అవకాశం ఉందని సీఈవో బుధవారం తెలిపారు. అందుకు అనుగుణంగా కేంద్ర ఎన్నికల సంఘం ఆదేశాలను అనుసరించి.. సన్నాహకాలు ప్రారంభించినట్లు వివరించారు. రాష్ట్రంలో చివరిసారిగా 2018లో అసెంబ్లీ ఎన్నికలు జరిగాయి. భారత ఎన్నికల సంఘం ఎన్నికలకు సన్నాహాలు ప్రారంభించగా, అవి 2023 చివరి త్రైమాసికంలో జరిగే అవకాశం ఉందన్నారు.
ముందస్తు ఎన్నికలకు భారత ఎన్నికల సంఘం నుంచి ఎలాంటి సూచనలు రాలేదని వికాస్‌రాజ్ తెలిపారు.సాంకేతికంగా జనవరిలోనే అసెంబ్లీ ఎన్నికలకు సన్నాహాలు ప్రారంభమయ్యాయని ఆయన చెప్పారు. ఇటీవల ఢిల్లీ నుంచి ఈసీ అధికారులు హైదరాబాద్ వచ్చి రాష్ట్ర అధికారులతో చర్చలు జరిపారు. అన్ని రాష్ట్రాలలో ఎన్నికలను నిష్పక్షపాతంగా నిర్వహించడానికి కొత్త పద్ధతులను అమలు చేయడంపై ఎన్నికల సంఘం అధికారులతో సమావేశమైంది. ముఖ్యంగా అన్ని స్థాయిల పోలింగ్ అధికారులకు శిక్షణ, ఓటింగ్ శాతాన్ని పెంచడానికి అవగాహన కార్యక్రమాలు. ఓటర్ల జాబితా సవరణపై చర్చించారు. ఓటర్ల జాబితాలను ఎప్పటికప్పుడు సమీక్షించాలని, తొలగింపు జాబితాను రూపొందించాలని అధికారులకు పిలుపునిచ్చారు.
రాష్ట్ర వ్యాప్తంగా రిటర్నింగ్ అధికారులతో కూడిన సమగ్ర జాబితాను సిద్ధం చేయాలని ఎన్నికల అధికారులకు సూచించారు.జూన్ 1 నుంచి ఈవిఎంల మొదటి స్థాయి తనిఖీలు ప్రారంభించాలని రాష్ట్ర స్థాయి అధికారులను కేంద్ర ఎన్నికల బృందం ఆదేశించింది. జిల్లా ఎన్నికల అధికారులకు రెండు రోజుల వర్క్ షాప్ నిర్వహించాలని సీఈవోను బృందం ఆదేశించింది. ఎలక్ట్రానిక్స్ కార్పొరేషన్ ఆఫ్ ఇండియా లిమిటెడ్ (ఇసిఐఎల్) సరఫరా చేసిన ఈవిఎంలను సరైన పరీక్షల అనంతరం జిల్లాలకు పంపనున్నారు.