మన తెలంగాణ/హైదరాబాద్ : తెలంగాణ రాష్ట్ర ఆరోగ్య శాఖ పని తీరును మంత్రి కెటిఆర్ ట్విట్టర్ వేదికగా అభినందించారు. జేబులో లేని వైద్య ఖర్చుల భారాన్ని తగ్గించడంలో తెలంగాణ డయాగ్నోస్టిక్స్ చొరవ గొప్ప విజయాన్ని సాధించిందన్నారు. 2018 జనవరిలో హైదరాబాద్‌లో ఒక హబ్‌తో ప్రారంభించిన ఈ డయాగ్నోస్టిక్స్ నేడు ఇతర జిల్లాలకు కూడా విస్తరించిందని హర్షం వ్యక్తం చేశారు. దీనిపై చొరవ తీసుకున్న ఆరోగ్య శాఖ మంత్రి హరీశ్‌రావుకు అభినందనలు తెలిపారు.ఈ సందర్భంగా తెలంగాణ డయాగ్నోస్టిక్స్ పని తీరు, విజయాలను వివరించారు.
తెలంగాణ డయాగ్నోస్టిక్స్ హబ్, స్పోక్ మోడల్‌లో ఉచిత డయాగ్నోస్టిక్ సేవలను అందిస్తుందని పేర్కొన్నారు. ప్రాథమిక ఆరోగ్య కేంద్రాలు, బస్తీ దవాఖానాల్లో అందుబాటులో ఉంటాయన్నారు. తెలంగాణ డయాగ్నోస్టిక్స్ 2 భాగాలను కలిగి ఉంటుందని తెలిపారు. ఉచిత రోగలక్షణ సేవలు (రక్తం మరియు మూత్ర పరీక్షలు), ఉచిత ఇమేజింగ్ సేవలు (ఎక్స్‌రే, యుఎస్‌జి, ఇసిజి, 2డి ఇసిహెచ్‌ఒ, మామోగ్రామ్) పొందవచ్చునని పేర్కొన్నారు. ఇప్పటి వరకు డయాగ్నోస్టిక్ ద్వారా మొత్తం 57.68 లక్షల మంది రోగులు ప్రయోజనం పొందారని తెలిపారు. 10.40 కోట్ల పరీక్షలు నిర్వహించబడ్డాయని ప్రకటించారు. తెలంగాణ డయాగ్నోస్టిక్స్ కింద ప్రస్తుతం 134 పరీక్షలు అందుబాటులో ఉన్నాయని తెలిపారు. ఈ ఇన్-హౌస్ హబ్, స్పోక్ మోడల్ డయాగ్నోస్టిక్స్‌ను నీతి ఆయోగ్ సైతం ప్రశంసించిందని మంత్రి కెటిఆర్ గుర్తు చేశారు.