2 లక్షల దాటిన దోస్త్ దరఖాస్తులు

ఆగస్టు 4న మొదటి సీట్ల కేటాయింపు

హైదరాబాద్ : రాష్ట్రంలో డిగ్రీ కళాశాలల్లో ప్రవేశాలకు ఈసారి మొదటి విడతలోనే దరఖాస్తులు రెండు లక్షలు దాటాయి. దోస్త్ మొదటి విడత రిజిస్ట్రేషన్లు ముగియగా, బుధవారం సాయంత్రం 6 గంటల వరకు 2,04,875 మంది విద్యార్థులు రిజిస్ట్రేషన్ చేసుకున్నారు. అందులో 1,88,918 మంది దరఖాస్తులు సమర్పించగా, 1,78,243 మంది విద్యార్థులు వెబ్ ఆప్షన్లు నమోదు చేసుకున్నారు. ఏటా మొదటి విడతలో సుమారు 1.50 లక్షల మంది దరఖాస్తు చేసుకుంటుండగా, ఈసారి సుమారు 50 వేల మంది అధికంగా దరఖాస్తు చేసుకున్నారు. ఆగస్టు 4వ తేదీన దోస్త్ మొదటి విడత సీట్లు కేటాయించనున్నారు. మొదటి విడత సీట్లు పొందిన విద్యార్థులు ఆగస్టు 5 నుంచి 9 వరకు ఆన్‌లైన్ ద్వారా సెల్ఫ్ రిపోర్టింగ్ చేయాలి. దోస్త్ రెండవ విడత రిజిస్ట్రేషన్లు, వెబ్ ఆప్షన్లు ఆగస్టు 5 ప్రారంభం కానుంది. వచ్చే నెల 25న రెండవ విడత సీట్లు కేటాయించనున్నారు.