గ్రూప్1 ప్రిలిమ్స్ రద్దుపై
పిటిషన్ వేయనున్న టిఎస్‌పిఎస్‌సి
పరీక్ష రద్దయితే వచ్చే ఏడాదే నిర్వహించే
అవకాశం? మళ్లీ ప్రిలిమ్స్ రాయాల్సి
వస్తుందేమో అని అభ్యర్థుల్లో గుబులు
హైదరాబాద్ : తెలంగాణ పబ్లిక్ సర్వీస్క మిషన్ నిర్వహించిన గ్రూప్-1 ప్రిలిమ్స్ పరీక్షను హైకోర్టు రద్దు చేయడంపై సోమవారం డివిజన్ బెంచ్‌లో అప్పీల్ పిటిషన్ వేయాలని కమిషన్ నిర్ణయించినట్లు సమాచారం. ఏకసభ్య ధర్మాసనం ఇచ్చిన తీర్పుపై అప్పీలుకు వెళ్లేందుకు టిఎస్‌పిఎస్‌సి న్యాయ నిపుణులను సంప్రదిస్తోంది. ఇప్పటి కే ఒకసారి రద్దయిన గ్రూప్1 ప్రిలిమ్స్, కోర్టు తీర్పుతో రెం డోసారి రద్దయితే.. అభ్యర్థులు మానసికంగా తీవ్ర ఆం దోళనకు గురవుతారని కమిషన్ భావిస్తోంది. ఈ మేరకు డివిజన్ బెంచ్ ముందు పిటిషన్ వేయాలని నిర్ణయానికి వచ్చినట్లు తెలిసింది.
ఒకవేళ రద్దు తీర్పును డివిజన్ బెంచ్ సమర్థిస్తే.. ఇప్పట్లో ప్రిలిమ్స్ నిర్వహణ సాధ్యం కాకపోవచ్చన్న అభిప్రాయాలు వ్యక్తమవుతున్నాయి. వచ్చే నెలలో అసెంబ్లీ ఎన్నికల షెడ్యూల్ వచ్చే అవకాశం ఉండటంతో అధికార యంత్రాంగం పూర్తిగా ఎన్నికల నిర్వహణ విధుల్లో నిగమ్నమైపోతుంది. ఈ నేపథ్యంలో అసెంబ్లీ ఎన్నికలు ముగిసిన తర్వాత అంటే దాదాపు 2024లోనే మళ్లీ గ్రూప్1 ప్రిలిమినరీ పరీక్ష జరిగే అవకాశం కనిపిస్తోంది.
అభ్యర్థుల్లో తీవ్ర గందరగోళం
గ్రూప్- 1 ప్రిలిమ్స్ పరీక్ష మరోసారి రద్దు కావడంతో అభ్యర్థుల్లో గందరగోళం నెలకొంది. ఇప్పటికే ఒకసారి రద్దు కావడంతో రెండోసారి పరీక్ష రాయాల్సి వచ్చిందని, ఇప్పు డు మళ్లీ పరీక్ష రాయాల్సి వస్తుందేమో అని ఆందోళన వ్య క్తం చేస్తున్నారు. తెలంగాణ రాష్ట్రం ఏర్పడిన తర్వాత గతేడా ది ఏప్రిల్‌లో గ్రూప్1 నోటిఫికేషన్ వెలువడింది. ఉమ్మడి ఆంధ్రప్రదేశ్ రాష్ట్రంలో 2011లో వెలువడిన గ్రూప్ 1 ప్రిలి మ్స్ ఉత్తీర్ణులైన వారికి తెలంగాణ పబ్లిక్ సర్వీస్ కమిషన్ మెయిన్స్, ఇంటర్వ్యూలు నిర్వహించి 128 నియామకాలు పూర్తి చేసింది.
2018లో తెలంగాణ 120కి పైగా పోస్టులతో తొలి గ్రూప్ -1 నోటిఫికేషన్ వెలువరించేందుకు టిఎస్‌పిఎస్‌సి కసరత్తు హర్తిచేసినా…నూతన రాష్ట్రపతి ఉత్తర్వు ల నేపథ్యంలో ప్రకటన విడుదల కాలేదు. దాదాపు నాలుగేళ్ల నిరీక్షణ అనంతరం మొదటిసారిగా అత్యధికంగా 503 గ్రూప్ 1 పోస్టులకు నోటిఫికేషన్ వెలువడింది. తెలంగాణ ప్రత్యేక రాష్ట్రంగా అవతరించిన తర్వాత తొలిసారిగా స్థానికులకు 95 శాతం రిజర్వేషన్లు కల్పించడం, ఇంటర్వ్యూలు లేకుండా ప్రిలిమ్స్, మెయిన్స్ ద్వారానే మొదటిసారి గ్రూప్ 1 పోస్టులను భర్తీ చేయాలని నిర్ణయించడంతో చాలాకాలం గా పోటీ పరీక్షలకు ప్రిపేరవుతున్న అభ్యర్థులందరూ గ్రూ ప్1పైనే దృష్టి సారించారు.
సాఫ్ట్‌వేర్ ఉద్యోగాలు చేస్తూ లక్షల్లో జీతాలు తీసుకుంటున్న వారితో పాటు ప్రభుత్వ, ప్రైవేట్ ఉద్యోగులు దీర్ఘకాల సెలవులు పెట్టి గ్రూప్1 పరీక్షలకు సిద్ధమయ్యారు. అయితే తెలంగాణ ఏర్పడిన త ర్వాత వచ్చిన తొలి గ్రూప్ 1 పరీక్ష సజావుగా జరగకపోవడంతో అభ్యర్థుల తీవ్ర నిరాశ చెందుతున్నారు. నోటిఫికేషన్ వెలువడి ఏడాదిన్నర గడుస్తున్నా ఇప్పటివరకు ప్రిలిమ్స్ పరీక్షనే విజయవంతంగా పూర్తి కాకపోవడంపై అసహనం వ్యక్తం చేస్తున్నారు. ఇప్పటికే ఒకసారి రద్దు కావడంతో రెండోసారి పరీక్ష రాయాల్సి వచ్చిందని, ఇప్పుడు మళ్లీ పరీక్ష రాయాల్సి వస్తుందేమో ఆందోళన చెందుతున్నారు. గ్రూప్1 ప్రిపరేషన్ కోసం నెలలు, సంవత్సరాల తరబడి వెచ్చించిన సమయం, ఖర్చు వృధా అవుతుందంటూ ఆవేదన వ్యక్తం చేస్తున్నారు.