భర్తీకి త్వరలో నోటిఫికేషన్లు ఎస్‌సి వర్గీకరణ
ప్రక్రియ కారణంగా జాప్యం భర్తీ కానున్న 2వేల
డ్రైవర్, 743 శ్రామిక్, 114 డిప్యూటీ సూపరింటెండెంట్
పోస్టులు : మంత్రి పొన్నం ప్రభాకర్
మన తెలంగాణ / హైదరాబాద్ : త్వరలోనే ఆర్‌టిసిలో 3,038 ఉద్యోగాలు భర్తీ చేయనున్నట్లు రవాణా, బిసి సంక్షేమ శాఖ మంత్రి పొన్నం ప్రభాకర్ వెల్లడించారు. ఆర్‌టిసిలో సుదీర్ఘ కాలం తర్వాత ఉద్యోగాల భర్తీ ప్రక్రియ ప్రారంభిస్తుండడం పట్ల ఆయన హర్షం వ్యక్తం చేశారు. 3,038 ఉద్యోగాల భర్తీకి ఇప్పటికే ప్రభుత్వం అనుమతి ఇచ్చిందని త్వరలోనే నోటిఫికేషన్ వేసి సాధ్యమైనంత త్వరలోనే ఉద్యోగాల భర్తీ ప్రక్రియ పూర్తి చేస్తామని వెల్లడించారు. గతంలో ఆర్‌టిసి ఉద్యోగాలు భర్తీ చేయాలని భావించినప్పుడు ఎస్‌సి వర్గీకరణ ప్రక్రియ కొనసాగుతుండటంతో ఉద్యోగాల భర్తీకి నోటిఫికేషన్ ఆలస్యం అయిందని ఆయన తెలిపారు.
ఇప్పుడు ఎస్‌సి వర్గీకరణ పూర్తి కావడంతో ప్రజా పాలన ప్రభుత్వం భారీగా ఉద్యోగ నియామకాలు చేపట్టిందన్నారు. అందులో భాగంగా త్వరలోనే ఆర్‌టిసి ఉద్యోగాలకు నోటిఫికేషన్ రానుందని – మంత్రి పొన్నం ప్రభాకర్ వెల్లడించారు. ముఖ్యమంత్రి రేవంత్ రెడ్డి నేతృత్వంలో ప్రజా పాలన ప్రభుత్వం ఆర్‌టిసిలో మహిళలకు ఉచిత ప్రయాణం అందిస్తుందని దీని ద్వారా ఆర్‌టిసిలో మహిళా ప్రయాణికుల సంఖ్య భారీగా పెరిగిందని ఆయన వెల్లడించారు. ఇప్పటి వరకు ఆర్‌టిసిలో 165 కోట్ల మంది మహిళలు ఉచితంగా ప్రయాణించినట్లు వివరించారు. దీని వల్ల వారికి రూ. 5,500 కోట్లు ఆదా అయ్యిందన్నారు. .ఇప్పటికే మహా లక్ష్మి కోసం కొత్త బస్సులు కొనుగోలు చేశామని ఇప్పుడు ఉద్యోగాల భర్తీకి ఆర్‌టిసి సన్నద్ధం అయిందని పేర్కొన్నారు.
ఆర్‌టిసి భర్తీ చేయనున్న మొత్తం 3,038 ఉద్యోగాల్లో డ్రైవర్ పోస్టులు 2 వేలు, శ్రామిక్ 743, డిప్యూటీ సూపరింటెండెంట్ (ట్రాఫిక్) 84, డిప్యూటీ సూపరింటిండెంట్ (మెకానికల్) 114, డిపో మేనేజర్ , అసిస్టెంట్ ట్రాఫిక్ మేనేజర్ 25, అసిస్టెంట్ మెకా ఇంజనీర్ – 18, అసిస్టెంట్ ఇంజనీర్ (సివిల్) – 23, సెక్షన్ ఆఫీసర్ ( సివిల్) -11, అకౌంట్ ఆఫీసర్స్ – 6, మెడికల్ ఆఫీసర్స్ జనరల్ – 7, మెడికల్ ఆఫీసర్స్ స్పెషలిస్ట్ – 7 పోస్టులకు త్వరలోనే నోటిఫికేషన్ ద్వారా భర్తీ చేయనున్నామన్నారు. ఇప్పటికే ప్రజా పాలన ప్రభుత్వం నిరుద్యోగులకు పెద్ద పీఠ వేస్తూ దాదాపు 60 వేలకు పైగా ఉద్యోగాలను భర్తీ చేసిందని మంత్రి పొన్నం ప్రభాకర్ వివరించారు.
ఇప్పుడు మరోసారి భారీస్థాయిలో ఉద్యోగాల నోటిఫికేషన్లు క్యాలండర్ ప్రకారం విడుదల చేయనున్నట్లు, నిరుద్యోగులు సద్వినియోగం చేసుకొని బాగా ప్రిపేర్ కావాలని సూచించారు. ఆర్‌టిసిలో సుదీర్ఘ కాలం తర్వాత ఉద్యోగాల భర్తీ జరుగుతుండడంతో ముఖ్యమంత్రి రేవంత్ రెడ్డికి, ఉప ముఖ్యమంత్రి బట్టి విక్రమార్కలకు మంత్రి పొన్నం ప్రభాకర్ ధన్యవాదాలు తెలిపారు.