వైరస్ విపత్తు కల్లోలంతో ప్రపంచ మానవాళి ప్రాణ భయంతో సామాజిక క్రమశిక్షణ పాటిస్తూ వ్యాక్సిన్ వేయించుకుంది. చికిత్స లేని భయంకర కోవిడ్ -19కు టీకాలే అంతిమ పరిష్కారమని నమ్మింది. అనేక ప్రాణాంతక రోగాలకు టీకాలు అందుబాటులోకి వచ్చాయి.నవజాత శిశువు నుంచి నిండు ముసలి వరకు అందరం అవసరాన్ని బట్టి టీకాలు వేయించుకుంటున్నాం. చేతులు కాలాక ఆకులు పట్టుకోవద్దు. వ్యాధి రాక ముందే వ్యాక్సిన్‌తో అడ్డుకుంటున్నాం. ఇన్ని ప్రయత్నాలు జరిగినప్పటికీ ప్రపంచ వ్యాప్తంగా ప్రతి యేటా 2 -3 మిలియన్ల పిల్లలకు పలు రకాల వ్యాధి నిరోధక టీకాలను ఇవ్వని కారణంగా అకాల మరణం నమోదు కావడం విచారకరం. వ్యక్తి జీవిత కాలంలో పలు సంక్రమణ వ్యాధులు రాకుండా ముందు జాగ్రత్తలతో నిరోధించడానికి అందుబాటులో ఉన్న వైద్య సదుపాయమే వ్యాక్సినేషన్ ప్రక్రియ. ఇప్పటికీ విశ్వవ్యాప్తంగా 18.7 మిలియన్ల శిశువులు టీకాలకు దూరంగా ఉంటూ, సులభంగా భయంకర మహమ్మారుల విష వలయంలో చిక్కుకోవడం జరుగుతున్నది.
అధిక జనాభా, పేదరికం, నిరక్షరాస్యత వంటి దీర్ఘకాలిక సమస్యలతో సతమతమవుతున్న భారతంలో అందరికీ టీకాలు అందించాలనే సదుద్దేశంతో ప్రవేశపెట్టిన ప్రతిష్ఠాత్మక ‘సార్వత్రిక వ్యాధి నిరోధక కార్యక్రమం (యూనివర్సల్ ఇమ్యునైజేషన్ ప్రోగ్రామ్)’ గత 3 దశాబ్దాలుగా అందుబాటులో వున్నప్పటికీ దేశంలోని 65% పిల్లలకు మాత్రమే మెుదటి సంవత్సరంలో రక్షణ లభిస్తోంది. భారత దేశంలో శిశువులు అందరికీ నూటికి నూరు శాతం వ్యాక్సినేషన్ వసతులు కల్పించాలనే భారీ లక్ష్యంతో కేంద్ర ఆరోగ్యశాఖ 2014లో ‘మిషన్ ఇంద్రధనుష్’ కార్యక్రమాన్ని కూడా చేపట్టి, మాతా శిశు సంపూర్ణ ఆరోగ్యానికి పునాదులు వేసే ప్రయత్నాలు చేస్తున్నారు. ప్రభుత్వాలు ఎన్ని చర్యలు తీసుకున్నప్పటికీ ప్రపంచ శిశువుల్లో 33 శాతానికి పైగా టీకాలు అందని పిల్లలు మన దేశంలో ఉన్నారనే వాస్తవం దేశ అనారోగ్య దుస్థితిని తెలియజేస్తున్నది. విశ్వమానవాళికి వ్యాక్సినేషన్ ప్రక్రియ ప్రాధాన్యతను వివరించేందుకు,
నిరోధించ గల భయంకర వ్యాధుల నుంచి జీవితకాల రక్షణ పొందేందుకు కావలసిన అవగాహన కల్పించేందుకు ప్రతి యేటా 10 నవంబర్ రోజున ‘ప్రపంచ వ్యాధి నిరోధకత దినం (వరల్డ్ ఇమ్యునైజేషన్ డే)’ పాటించడం జరుగుతున్నది. జీవప్రక్రియ ద్వారా తయారు చేయబడి, ఒక ప్రత్యేక వ్యాధిని జీవిత కాలం నిరోధించడానికి సామర్థ్యం కలిగిన ప్రత్యేక ఔషధాన్ని టీకా లేదా వ్యాక్సిన్ అంటాం. టీకాలు ఇప్పించడంతో వ్యక్తి శరీరంలో రోగ నిరోధకశక్తి జీవితకాలం బలపడుతుంది. ప్రభుత్వ ఆరోగ్య కేంద్రాలలో ఉచితంగా, ప్రైవేట్ ఆసుపత్రుల్లో ఖరీదుకు అందుబాటులో ఉన్న టీకాలను సకాలంలో క్రమం తప్పకుండా శిశువులకు అందించాల్సిన కనీస బాధ్యత తల్లిదండ్రుల మీద అధికంగా ఉన్నది.ఎలాంటి దుష్ప్రభావం లేని టీకాలను వైద్యుల సలహాలతో మాత్రమే ఇప్పించడం శ్రేయస్కరం.
ప్రపంచ ఆరోగ్య సంస్థ గణాంకాల ప్రకారం 25 రకాల సంక్రమణ వ్యాధులను నిరోధించడానికి 240 రకాల టీకాలున్నాయి. 1802 లో మూడేళ్ల భారత బాలిక ప్రప్రథమంగా మశూచి టీకాను తీసుకొని చరిత్ర సృష్టించింది. గత ఆరు దశాబ్దాలుగా టీకాల సహాయంతో మశూచి వ్యాధిని శాశ్వతంగా అరికట్టగలగడం ఒక వైద్యరంగ ఘన విజయంగా చెప్పవచ్చు. అతి భయంకరమైన పోలియో వ్యాధిని సమూలంగా అరికట్టేందుకు, ‘పోలియో రహిత భారత్’ గా 2014లో ప్రకటించేందుకు పోలియో టీకాలు అందరికీ అందుబాటులో ఉండడమే కారణం. డిప్తీరియా, మాసిల్స్, టిబి, పోలియో, రోటా వైరస్, హెపటైటిస్ ఏ/బి, కలరా, మంప్స్, ర్యాబిస్, రుబెల్లా, మశూచి, టెటనస్, టైఫాయిడ్, ఎల్లో ఫివర్, డయేరియా, న్యూమోనియా లాంటి అనేక వ్యాధులకు సరైన చవకైన టీకాలు అందుబాటులో ఉన్నాయి.
ప్రపంచ వ్యాప్తంగా యూనిసెఫ్ గుర్తించిన ప్రమాదకర వ్యాధుల్లో మీసిల్స్, పోలియో, డిప్తీరియా, వూఫింగ్ కాఫ్, డెంగ్యూ, టిబి, టెటనస్‌లకు టీకాలతోనే చరమగీతం పాడవచ్చు. శిశువుకు పూర్తి వ్యాధి నిరోధక సురక్షను కలిగించడానికి ఒక డోస్ బిసిజి, మూడు డోసుల పిసివి, పోలియో చుక్కలు, రెండు డోసుల రోటా వైరస్, ఒక డోసు మీసిల్స్ టీకాలను నిర్దేశించిన వయసుల్లో ఇప్పించాలి. నేటికీ హెచ్‌ఐవి/ ఎయిడ్స్, హంటింగ్టన్ వ్యాధి, హైడ్రోసిఫలస్‌ల వంటి కొన్ని భయంకర వ్యాధులకు సరైన టీకాలు అందుబాటులో లేకపోవడం విచారకరం. సార్వత్రిక వ్యాక్సినేషన్‌లో వైఫల్యాలకు కారణాలుగా ప్రభుత్వ బలహీన ఆర్థిక స్థితి, ప్రజల్లో అవగాహనా లేమి, నిరక్షరాస్యత, అధిక జనాభా, వ్యాక్సిన్ల కొరత లాంటి అవరోధాలను చెప్పవచ్చు. ప్రతి వ్యాక్సిన్‌కు కాలపరిమితి (ఎక్సపైరీ) ఉండడం,
సకాలం అందకపోవడంతో టీకా మందులు గడువు కాలం దాటిన తరువాత వృథా కూడా అయిపోతున్నాయి. అందుబాటులో ఉన్న టీకాలను పిల్లలకు సకాలంలో ఇప్పించే ఆరోగ్య మహాయజ్ఞంలో తల్లిదండ్రులు, పౌర సమాజం, స్వచ్ఛంద సంస్థలు, ప్రభుత్వాలు తమ తమ కర్తవ్యాలను నిర్వహించాలి. వ్యాక్సిన్ అందుబాటులో లేని హెచ్‌ఐవి లాంటి వైరస్‌లకు త్వరగా పరిశోధనా ఫలితాలతో పరిష్కారాలు రావాలని ఎదురు చూస్తూ, అవి సంక్రమించకుండా తగు జాగ్రత్తలు తీసుకుంటూ, వ్యాధి సోకక ముందే నివారించుకునే ప్రయత్నాలు చేద్దాం. టీకాలతో జీవిత కాల రక్షణ పొందుతాం.