సిఎం రేవంత్‌రెడ్డి ప్రకటన
నగరంలో గ్లోబల్ కేపబులిటీ
సెంటర్ ఏర్పాటు చేయనున్న
వాన్ గార్డ్ సంస్థ ఏఐ,
డేటా అనాలసిస్, మొబైల్
టెక్నాలజీ కేంద్రంగా
వ్యవహరించనున్న జిసిసి ఈ
ఏడాది చివరినాటికి ప్రారంభం
వచ్చే నాలుగేళ్లలో 2,300
ఉద్యోగావకాశాలు వాన్‌గార్డ్‌కు
దేశంలో ఇదే తొలి కేంద్రం
హైదరాబాద్‌లో సానుకూల
పరిస్థితులు ఉన్నందునే జిసిసి
ఏర్పాటు: వాన్ గార్డ్ ప్రతినిధులు
మన తెలంగాణ/హైదరాబాద్: హైదరాబాద్‌ను గ్లోబల్ కేపబులిటీ సెంటర్ల (జిసిసి) హబ్‌గా అభివృద్ధి చేయనున్నట్లు సిఎం రేవంత్‌రెడ్డి తెలియజేశారు. ప్రపంచ స్థాయి జిసిసిలకు హైదరాబాద్‌ను గమ్యస్థానంగా మారుస్తామని తెలిపారు. అత్యం త ప్రతిష్ఠాత్మకమైన వాన్ గార్డ్ కంపెనీ హైదరాబాద్‌లో జిసిసిని ఏర్పాటు చేయనునట్లు ప్రకటించిన సందర్భంగా సిఎం మాట్లాడుతూ ఈ ప్రకటన చేశారు. ఈ ఏడాది చివరి నాటికి హైదరాబాద్‌లో తమ జీసీసీ కార్యాలయాన్ని అధికారికంగా వాన్ గార్డ్ వెల్లడించింది. రాబోయే నాలుగు సంవత్సరాల్లో 2,300 మంది ఉద్యోగులను నియమించుకోవాలని లక్ష్యంగా పెట్టుకుంది. వాన్ గార్డ్ ప్రతినిధి బృందం సోమవారం ఉదయం బంజారాహిల్స్ లోని సీఎం నివాసంలో ముఖ్యమంత్రి రేవంత్ రెడ్డితో భేటీ అయింది. వాన్‌గార్డ్ సీఈవో సలీం రాంజీ, ఐటీ డివిజన్ సీఐవో, ఎండీ నితిన్ టాండన్, చీఫ్ హెచ్‌ఆర్ ఆఫీసర్ జాన్ కౌచర్, జిసిసి-వాన్‌గార్డ్ ఇండియా హెడ్ వెంకటేష్ నటరాజన్ నేతృత్వంలో కంపెనీ ప్రతినిధి బృందం ఈ చర్చల్లో పాల్గొన్నారు. ముఖ్యమంత్రితో పాటు ప్రభుత్వ ప్రధాన కార్యదర్శి శాంతి కుమారి, సిఎంవో ఉన్నతాధికారులు ఈ సమావేశంలో ఉన్నారు. రాష్ట్ర ప్రభుత్వంతో జరిగిన చర్చల అనంతరం హైదరాబాద్ లో జీసీసీ ఏర్పాటు నిర్ణయాన్ని ఆ సంస్థ ప్రకటించింది. మన దేశంలో వాన్ గార్డ్ నెలకొల్పే తొలి జీసీసీ ఇదే కావటం విశేషం.
ప్రపంచంలో పేరొందిన సంస్థ
వాన్‌గార్డ్ ప్రపంచంలో పేరొందిన పెట్టుబడి సంస్థ. ప్రపంచ వ్యాప్తంగా సుమారు 10 ట్రిలియన్ డాలర్ల విలువైన ఆస్తులను ఈ కంపెనీ నిర్వహిస్తుంది. ప్రపంచవ్యాప్తంగా 50 మిలియన్లకు పైగా పెట్టుబడిదారులకు వాన్‌గార్డ్ సేవలు అందిస్తుంది. హైదరాబాద్‌లో వాన్ గార్డ్ సంస్థ ఏర్పాటు చేసే కేంద్రం ఇన్నోవేషన్ హబ్‌గా పనిచేయనున్నది. ఆర్టిఫిషియల్ ఇంటెలిజెన్స్, డేటా అనలిటిక్స్, మొబైల్ ఇంజనీరింగ్ వంటి అధునాతన సాంకేతిక రంగాల్లో అందుకు అవసరమైన ఇంజనీర్లను తక్షణమే నియమించుకోవాలని ప్లాన్ చేస్తోంది.
సంతోషకరం : సిఎం రేవంత్ రెడ్డి
హైదరాబాద్ లో వాన్ గార్డ్ గ్లోబల్ కెపాబిలిటీ సెంటర్ (జిసిసి) ఏర్పాటుకు ముందుకు రావడం ఆనందదాయకమని ముఖ్యమంత్రి ఎనుముల రేవంత్ రెడ్డి తెలిపారు. వాన్ గార్డ్ రాకతో ప్రపంచ స్థాయిలో హైదరాబాద్ మరింత బలపడుతుందని అన్నారు. మన దేశంలోని ప్రతిభను ఉపయోగించుకోవడానికి, సాంకేతిక నిపుణులకు ఉద్యోగ అవకాశాలను మెరుగుపరుస్తుందని వివరించారు. రాష్ట్ర ప్రభుత్వం తరఫున తగిన సహకారం అందిస్తుందని కంపెనీ ప్రతినిధులకు ముఖ్యమంత్రి భరోసా ఇచ్చారు.
అనుకూల పరిస్థితులున్నాయి: సీఈవో సలీంరాంజీ
హైదరాబాద్‌లో వైవిధ్యమైన ప్రతిభతో పాటు, జీవన నాణ్యత, సాంకేతిక నైపుణ్యం, ఆవిష్కరణలకు అనుకూలమైన వాతావరణం ఉందని వాన్ గార్డ్ కంపెనీ సీఈవో సలీం రాంజీ అభిప్రాయం వ్యక్తం చేశారు. వీటికి తోడుగా రాష్ట్ర ప్రభుత్వం అందిస్తున్న సహాయ సహకారాలతో హైదరాబాద్ తమకు అనువైన స్థలంగా ఎంపిక చేసుకుంటున్నలు చెప్పారు. తమ వినియోగదారులకు ప్రపంచస్థాయి సేవలను అందించటంతో పాటు ఏఐ, మొబైల్, క్లౌడ్ టెక్నాలజీలో ప్రతిభావంతులైన ఇంజనీర్లను అవకాశాలు కల్పించటం తమకు సంతోషంగా ఉందని వెల్లడించారు.