అంతర్జాతీయ క్రికెట్ మండలి (ఐసిసి) ప్రకటించిన టి20 బౌలింగ్ ర్యాంకింగ్స్‌లో భారత యువ స్పిన్నర్ వరుణ్ చక్రవర్తి ఐదో ర్యాంక్‌ను దక్కించుకున్నాడు. ఇంగ్లండ్‌తో జరుగుతున్న సిరీస్‌లో వరుణ్ అద్భుత బౌలింగ్‌తో అలరిస్తున్నాడు. రాజ్‌కోట్ వేదికగా జరిగిన మూడో టి20లో ఏకంగా ఐదు వికెట్లను పడగొట్టాడు. దీంతో తాజా ర్యాంకింగ్స్‌లో అనూహ్యంగా 25 స్థానాలు ఎగబాకి ఐదో ర్యాంక్‌కు చేరుకున్నాడు. వరుణ్ కెరీర్‌లో ఇదే అత్యుత్తమ ర్యాంక్ కావడం విశేషం. ఇంగ్లండ్‌తో సొంత గడ్డపై జరుగుతున్న టి20 సిరీస్‌లో వరుణ్ మెరుగైన ప్రదర్శనతో ఆకట్టుకుంటున్నాడు. పొదుపుగా బౌలింగ్ చేయడమే కాకుండా కీలక సమయంలో వికెట్లను కూడా పడగొడుతూ జట్టుకు అండగా నిలుస్తున్నాడు. దీంతో అతను టాప్5లో చోటు సంపాదించుకున్నాడు. ఇంగ్లండ్ స్పిన్నర్ ఆదిల్ రషీద్ ఒక స్థానం మెరుగుపరుచుకుని తిరిగి టాప్ ర్యాంక్‌ను దక్కించుకున్నాడు.
ఇంగ్లండ్‌కే చెందిన ఫాస్ట్ బౌలర్ జోఫ్రా ఆర్చర్ 13 స్థానాలు ఎగబాకి ఆరో ర్యాంక్‌ను సొంతం చేసుకున్నాడు. భారత్‌తో జరుగుతున్న సిరీస్‌లో ఆర్చర్ మెరుగైన బౌలింగ్‌ను కనబరుస్తున్నాడు. భారత స్పీడ్‌స్టర్ అర్ష్‌దీప్ సింగ్ తొమ్మిదో ర్యాంక్‌ను నిలబెట్టుకున్నాడు. స్పిన్నర్ రవి బిష్ణాయ్ తాజా ర్యాంకింగ్స్ ఐదు స్థానాలు దిగజారి పదో ర్యాంక్‌తో సరిపెట్టుకున్నాడు. అక్షర్ పటేలు ఐదు స్థానాలు మెరుగుపరుచుఉని 11వ ర్యాంక్‌లో నిలిచాడు. కాగా, అకీల్ హోస్సేన్ (విండీస్) రెండో, వానిందు హసరంగ (శ్రీలంక) మూడో, ఆడమ్ జంపా (ఆస్ట్రేలియా) నాలుగో ర్యాంక్‌ను దక్కించుకున్నారు.ఇక బ్యాటింగ్ ర్యాంకింగ్స్‌లో ఆస్ట్రేలియా స్టార్ ఆటగాడు ట్రావిస్ హెడ్ టాప్ ర్యాంక్‌లో కొనసాగుతున్నాడు. హెడ్ 855 రేటింగ్ పాయింట్లతో టాప్ ర్యాంక్‌ను నిలబెట్టుకన్నాడు. భారత యువ సంచలనం, హైదరాబాదీ స్టార్ బ్యాటర్ తిలక్ వర్మ ఒక ర్యాంక్ మెరుగుపరుచుని రెండో స్థానానికి చేరుకున్నాడు. ఇంగ్లండ్‌తో జరుగుతున్న సిరీస్‌లో తిలక్ వర్మ అత్యతం నిలకడైన బ్యాటింగ్‌ను కనబరుస్తున్న సంగతి తెలిసిందే.
రెండో టి20లో వీరోచిత బ్యాటింగ్‌తో జట్టును గెలిపించాడు. దీంతో అతను తాజా ర్యాంకింగ్స్‌లో ఒక స్థానాన్ని మెరుగుపరుచుకున్నాడు. ఇంగ్లండ్ బ్యాటర్ ఫిల్ సాల్ట్ ఒక ర్యాంక్ కోల్పోయి మూడో ర్యాంక్‌కు పడిపోయాడు. భారత టి20 కెప్టెన్ సూర్యకుమార్ యాదవ్ నాలుగో ర్యాంక్‌ను కాపాడుకున్నాడు. ఇంగ్లండ్ సారథి జోస్ బట్లర్ ఐదో ర్యాంక్‌లో కొనసాగుతున్నాడు. బాబర్ ఆజమ్ (పాకిస్థాన్) ఆరో, పాథుమ్ నిసాంకా (శ్రీలంక) ఏడో ర్యాంక్‌ను దక్కించుకున్నాడు. పాకిస్థాన్ స్టార్ బ్యాటర్ మహ్మద్ రిజ్వాన్ ఒక ర్యాంక్‌ను మెరుగుపరుచుకుని 8వ ర్యాంక్‌లో నిలిచాడు. భారత యువ ఆటగాడు యశస్వి జైస్వాల్ ఒక ర్యాంక్ కోల్పోయి 9వ స్థానాన్ని దక్కించుకున్నాడు. కుసాల్ పెరీరా (శ్రీలంక) పదో ర్యాంక్‌ను నిలబెట్టుకున్నాడు.