హీరో ఉస్తాద్ రామ్ పోతినేని క్యారెక్టర్లు, లుక్స్ పరంగా ఎప్పటికప్పుడు విభిన్నంగా కనిపిస్తూ ప్రేక్షకులను అలరిస్తుంటారు. ఇప్పుడు మరో కొత్త లుక్, క్యారెక్టర్‌తో హీరోగా ప్రేక్షకుల ముందుకు వచ్చారు. ఆయన కథానాయకుడిగా మైత్రి మూవీ మేకర్స్ నిర్మాణంలో యువ దర్శకుడు మహేష్ బాబు పి తెరకెక్కిస్తున్న సినిమా హీరో క్యారెక్టర్ లుక్‌ను శుక్రవారం విడుదల చేశారు. నవీన్ ఎర్నేని, రవి శంకర్ యలమంచిలి నిర్మిస్తున్న ఈ సినిమా హీరోగా రామ్‌కు 22వది.
ఇంకా టైటిల్ ఖరారు చేయలేదు. ఈ సినిమాలో సాగర్ పాత్రలో రామ్ నటిస్తున్నారు. శుక్రవారం ఆయన క్యారెక్టర్ లుక్ విడుదల చేశారు. ‘మీకు సుపరిచితుడు… మీలో ఒకడు… మీ సాగర్’ అం టూ రామ్ పాత్రను పరిచయం చేశారు దర్శకుడు మహేష్ బాబు. రామ్ క్యారెక్టర్ లుక్ చూస్తే… వింటేజ్ ఫీలింగ్ కలుగుతుంది.
పాత రోజుల్లో ఉపయోగించే సైకిల్, రామ్ లాంగ్ హెయిర్, క్లీన్ షేవ్, అన్నిటికి మించి రామ్ ముఖంలో నవ్వు… ఫస్ట్ లుక్ చూడగానే ఒక ఆహ్లాదకరమైన ఫీలింగ్ కలుగుతోంది. ఫస్ట్ లుక్ విడుదల చేయడంతో పాటు శుక్రవారం రెగ్యులర్ షూటింగ్ మొదలైందని దర్శక నిర్మాతలు తెలిపారు. ప్రస్తుతం హైదరాబాద్‌లో షూటింగ్ జరుగుతోంది. రామ్ జంట గా భాగ్యశ్రీ బోర్సే కథానాయికగా నటిస్తోంది.