యాదాద్రి ః శ్రీలక్ష్మీనరసింహ స్వామి యాదాద్రి క్షేత్రంలో అండాళ్ అమ్మవారికి ఊంజల్ సేవ మహోత్సవాన్ని ఆలయ అర్చకులు వేడుకగా నిర్వహించారు. శుక్రవారం అమ్మవారికి ప్రీతికరమైన రోజు కావడంతో ఉదయం అభిషేకం, సాయంత్రం ఆలయ మండపంలో అమ్మవారిని ప్రత్యేకంగా అలంకరించి ఊంజల్ సేవ మహోత్సవాన్ని నిర్వహించారు. అమ్మవారిని ప్రత్యేక అలంకరణ చేసిన అర్చకులు మేళతాళాలు, మంత్రోచ్ఛరణ గావిస్తూ అమ్మవారి సేవను ఆలయ పురవీధులలో ఊరేగించారు. అద్దాల మండపములో అమ్మవారి సేవను వేచింప చేసి ఊంజల్ సేవ ప్రత్యేకతను భక్తులకు అర్చకులు వివరించారు. భక్తజనులు స్వామి అమ్మవారిని దర్శించుకొని తరించారు.
శ్రీవారి నిత్యరాబడి..
యాదాద్రి శ్రీలక్ష్మీనరసింహ స్వామి ఆలయ నిత్యరాబడిలో భాగంగా శుక్రవారం రోజున రూ.12,70,012 ఆదాయం వచ్చినట్లు ఆలయ అధికారులు తెలిపారు. ప్రధాన బుకింగ్ ద్వారా రూ.88,000, బ్రేక్ దర్శనం ద్వారా రూ.80,100, వ్రత పూజల ద్వారా రూ.47,200, వీఐపీ దర్శనాల ద్వారా రూ.60,000, కొండపైకి వాహనాల ప్రవేశం ద్వారా రూ.1,50,000, ప్రసాద విక్రయం ద్వారా రూ.6,08,980తో పాటు తదితర శాఖలు, పాతగుట్ట ఆలయం నుంచి ఆదాయం వచ్చినట్లు ఆలయ అధికారులు తెలిపారు.
శ్రీవారిని దర్శించుకున్న మినిస్ట్రీ ఆఫ్ ఎలక్ట్రానిక్స్ డైరెక్టర్ జనరల్..
యాదాద్రి శ్రీలక్ష్మీనరసింహస్వామి వారిని మినిస్ట్రీ ఆఫ్ ఎలక్ట్రానిక్స్ డైరెక్టర్ జనరల్ సంజయ్. శుక్రవారం స్వామి వారిని దర్శించుకొని ప్రత్యేక పూజలు చేసిన సంజయ్‌కి ఆలయ అర్చకులు వేదాశీర్వచనం చేశారు. ఆలయ అధికారులు స్వామివారి ప్రసాదాన్ని అందజేశారు.
ఈనెల 26 నుంచి పాతగుట్ట ఆలయంలో పవిత్రోత్సవాలు..
యాదాద్రి క్షేత్ర అనుబంధ ఆలయమైన పాతగుట్ట లక్ష్మీనరసింహస్వామి వారి ఆలయంలో ఈనెల 26 నుంచి 28వ తేదీ వరకు పవిత్రోత్సవాలు అంగరంగ వైభవంగా నిర్వహించనున్నట్టు ఈవో గీత తెలిపారు. శుక్రవారం ఒక ప్రకటనలో ఆమె వివరాలు తెలియజేశారు. పవిత్రోత్సవాల సందర్భంగా 27, 28 తేదీల్లో నిత్య, శాశ్వత కల్యాణం, నిత్య, శాశ్వత బ్రహ్మోత్సవం, లక్షపుష్పార్చన, శ్రీసుదర్శన నారసింహ హోమాన్ని రద్దు చేస్తున్నట్లు తెలిపారు.